. بلحق دري لي هبط من طوموبيل جاي قاصدني ، جاي جيهتي نيشان .. غير قرب ليا و أنا نعرفو ، هد الدري ولد رباط ، كنا كنتجمعو حنى بيناتنا كليلكة ، بنات أو ولاد ، شحال من مرة خرجنا مجموعين ، دوزنا لحماق ، بلحق هادشي شحال هادي ، قرن أو غزالة .. موحال واش غيعقل عليا مزيان ، متردد ، حتى من دخلة لي دخلني بيها ورقاتو ، حتى صاحبو لي بقى كالس فطوموبيل طلعت كنعرفو ، بقاو كيقولو هي لا مشي هي ، أو قصدوني باش يتأكدو .. أنا غير هضر معايا بديت كنفكرو فلمود باسات ، صافي حيد شك بليقين ديك ساعة .. مالك اش كاديري هنا ؟ جاتو عجب يلقاني هنا ، قلت ليه بلي هادي قصة طويلة .. هاديك لأمة كلها ديال لباشار لي كانت فطوموبيلات هبطات تتقهوى .. غيضربو شحال من فرخ بحجرة وحدة ، غيكلسو يسمعو لقصة ديالي أو منها نيت غيتسناو واحد دري صاحبهم حتى هو غيجي لعندهم بطوموبيل أو فوق هد شي كامل غيكلسو يشربو قهوة .. أول مرة ما غنبقى حاسة براسي بوحدي ، ما بقيت مخلوعة ، جاب ليا الله لي يونسني واخا غير شوية ديال الوقت .. بديت كنعاود ليهم لقصة كيفاش طرات ، بديتها من مراكش ، كيف ضايفتها أو كيف رضاتها ليا هي دابا .. كملت ليهم لقصة ، ها لي كيسب ، ها لي كيتحلف عليها ، لي كيعاير .. ما كاين غير من سمطة لتحت ، حتى لبنات كيسبو .. شربنا قهوة ، ضحكنا ، قلنا شي نكات .. بلهضرة نساو صاحبهم لي غيجي لعندهم ، غاد رضو ليه لبال بلي تعطل عليهم .. هز واحد فيهم تيليفون أو تاصل بيه ، جوج مرات التيليفون كيصوني أو ما كيجاوب ، لمرة ثالتة شد ليه تيليفون ، أنا كنسمع اش كيتقال غير من عند واحد أو كنتخيل لاخر باش
كيجاوبو ، دوزت لفيلم ديال لمكالمة غير فراسي ..
الدري لي كيهضر فتيليفون : وا فينك أفلان ، مالك تعطلتي .. لبوليس .. مالهم علاش وقفوك .. ياك ما لقاو عندك شي حاجة من سلعة .. ايوا صافي علاش مازال موقفينك .. سالات ليك لافيزيت ، أو مالك ما رضيتي ليها لبال .. ايوا صافي دور معهم أو غيطلقوك ، راه باغين غير
تضويرة .. مال فلوسك فيناهوما .. مال هد الناس ما كيقنعوش .. عرفتي اش غدير ، ها حنى غنجيو عندك أو نفاريوها
معاهم ...
فاش بدا كيهضر فتيليفون ، كلشي سكت أو بدا كيتمزك ليه أش كيقول ، أو باينة كل واحد فينا بدا كيتخيل لاخر باش كان كيجاوبو .. غير كمل تيليفون ، كلشي بدا كيسول اش طاري ، باش ما يبقى يضيع لوقت أو يجاوب كل واحد بوحدو ، كال ليهم حتى لطريق أو نعاود ليكم .. بزربة طار خلص سرباي فلقهاوي كاملين أو خلا ليه بورفوار مزيان .. كيفما زرب على سرباي زرب عليا حتى أنا ، قال ليا غتكلسي تسنانيا فطوموبيل بيدما جينا .. بقيت غير ساكتة ما لقيت باش نجاوبو ، ما بغيت نعطلهم على صاحبهم ، قلت مع راسي اللهم نتخبى فطوموبيل أولا نبقى كالسة فهد لقهوة .. صافي مشيت كلست فطوموبيل ، خلاو ليا لكونطاك ، دري عارفني بلي كنعرف نسوك .. ، واحد منهم حيد من يدو ساعة دايرة زبالة ديال فلوس قال لي خليها عندك ، جبدو لفلوس لي عندهم ، غير لماصوات صحاح ، غير زرقات ، على الأقل غتكون شي عشرة ديال لمليون ، حطو تيليفونات ، داو غير واحد جوج عضوما معاهم .. خلاو كلشي عندي أو داحسو فطوموبيل ثانية أو مشاو ...
يتبع ...
