صليحة : الحلقة 15
ربعيام ديال الباكور فلوطيل بزربة دازت ، ليوم خاصني نخرج نقلب على أول كليان ممكن نجيبو باش يشري لغبرة ، من الأفضل نقلب على شي واحد ما عمرو ما جرب أو نقنعو باش نجرب أنا وياه أو نمشيو نديرو حوايج خرى من بعد.. غير كنقد نقنعو كنوريه كيفاش يمشي يشري أو شنو الخطة لي يتبع حتى كيشري ، غير هو كيشري داك شي ، كنزيد بحالي أو كنلقى شي سبة لي نبقى شادة معاه الخط بيها بيدما تبلى ، غير كيتبلى ما كنبقى نعقل عليه .. هكدا كانت الخطة لي تافقت عليها مع خونا ، هكدا غنجيب لكليان ، التفاصيل مهمة فهد القضية ، أي حاجة كتكولها أولا كديرها خصك ترد ليها البال مزيان ، خص تبقى عاقل على لوجوها مزيان ، ما خصك تنسى حتى حاجة .. باش تخدم فهد الخدمة خاص ما يكون عندك لقلب ، ما تكون كتحن فبنادم ـ تحيد شي حاجة سميتها الشفقة أو بالأخص ما تيق فتواحد ..
فقت معطلة كيف العادة ليوم ، من نهار جيت أو أنا ما كنفيق حتى لأش من وقت ، فطرت على خاطري ، لبست حوايجي ، ماكيت ، تقاديت مزيان .. عطاني خونا ألفين درهم قبل ما نخرج ، هاد لفلوس كتبقى ديما معايا ، إحتياط ، حتى واحد ما عارف أش يوقع ، لفلوس غادي تنفعني فجميع الأحوال ، لفلوس كتحل شحال من مشكل ، بصح لفلوس ماشي هي كلشي بلحق لفلوس مهمة بزاف .. من فوق ديك ألفين درهم خديت شي فلوس خرى باش نتحرك ، باش نمشي لقهاوي أو باش نركب فطاكسيات ، الطكسيات فمراكش غاليين بزاف .. أهم حاجة مني نتلاقا مع شي كليان خصني نخليه هو لي يخلص ، باش أولا نعرف واش عندو لفلوس لكافية باش يشري لعجب أو ثانيا باش ننقص لمصاريف باش كنتحرك ، باش حتى إيلا ما شرى والو ما كنضيع لفلوس باش كنتحرك غير على لخاوي ..مني كنشوف هاد لفلوس كاملة لي تخسرات عليا فلوطيل أو داكشي كنبقى نسول راسي أنا شحال غنجيب ليه كاع ديال لفلوس ..
بقيت كالسة فلوطيل لتحت فريسبسيون حتى يبرد لحال ، مراكش سخونا هاد ليام بزاف ، دنيا عامرة أو مخلطة .. لكليان لي خاصني نجيب ممكن يكون مغربي ممكن يكون أجنبي أنا و شطارتي .. أهم حاجة هي خاصني نلقى لراسي بروفيل جديد نقدم راسيه بيه لناس ، ما يمكن نقول ليهم لمعلومات لحقيقية عليا ، خاصني نرسم شي بروفيل لي ما ندوخ فيه أو نبدى غير ندخل أو نخرج فلهضرة ، لكليان خصو يتيق فيا مزيان ، إيلا شك غير فشي حاجة صغيرة راه مشى كلشي .. غير برد لحال خرجت ، فلول ما عرفت فين نمشي بحال إيلا ما كنعرف حتى بلاصة فهاد مراكش ، شيرت لطاكسي أو ركبت ، زاد مدة مع الطريق أو هو ما عارف حتى فين غادي ، غاد من بعد قلت ليه يقصد واحد القهوة ..
فلقهوة كلست شي ربع ساعة ، جبدت لباكيا ديال الكارو ، واخا عندي لبريكة ما بغيت نجبدها ، بانت ليا بريكة عند زاحد خونا أو بانت ليا فيه .. خويا واش ممكن تعطيني بريكة ؟ هادي أو كلمة قلت ليه ..
.. يتبع
للتواصل مع الكاتب على الفيسبوك، اضغط هنا :العربي البحتوري
