حْييت من جديد (الجزء الأول) ~ فاطمة الزهراء خولالي~

كانت كالسة متوترة و عينيها على الساعة،، ماشي من عوايدو ،، ولكن هاد الايام كتر بزاف ،، دخلها الشك ،، شي حاجة ماشي هي هاذيك ،، هاكدا كان كيقوليها الحدس ديالها ولكن مابغاتش تستسلم لوساويس الشيطان ،،اخيرا الباب تحل   ،، وقفات من بلاصتها






سارة : فين كلستي تالهاد الوقت
أمين : شتي انا على قبل هاد النكير ديالك مابقيتش ندخل بكري
سارة : ياك اسيدي ، وليتي دير السبا بيا ، كنسولك فين كنتي رديتيني نكارة ، راك مزوج مابقيتيش عزري دخل وقتما بغيتي وتخرج وقتما بغيتي وانا نبقا هنا النهار كامل
أمين : وشكون الالة اللي حبسك ، ديريليك شي شغال ماتبقايش مقابلاني
سارة مشات لبيتها حسات براسها مافيها مايكمل الهضرة حيت ماغاتوصلها لوالو ، أمين تبدل بزاف
مكانش هكا فالاول ديال زواجهم كان ضريف و كيهتم بيها و كيخرجها ، فجأة تقلب مابقاش كيعمر الدار ،، وماكيهتمش بيها
نعلات الشيطان و قالت يمكن الضغوط ديال الخدمة وحطات راسها ونعسات بلا ماتفكر فوالو
فالصباح حسات بأمين فاق يمشي لخدمتو دارت راسها ناعسة ،، باش مايبداوش صباحهوم بالمشادات الكلامية،،
أمين حس بيها فايقة : ماتسناينيش للغدا ،، عندي شي شغال
سارة دارت راسها ماسمعاتش و هبطو دموعها ،، 
حسات بالقهرة ،، وبالبرود اللي ولا ساكن فعلاقتهوم ،، بكات فصمت و عقلها كيسافر بيها لاجمل الذكريات اللي دوزاتهوم مع امين

يتبع،،

طاقم مدونة الأدب

10:59