فاطنة ( تولستوي بالدارجة )~ بقلم الكاتب الشبندق ~

كان  العربي  ولد  خدوج  القابلة  من الناس  المقودين فالدوار  بئر  النصر  إقليم  بن  سليمان .. كان  منو  لقايد  صاحبو  و  مزوج  بختو  ربيعة   لي  ولدت  ليه  ..بوجمعة  و شعيب  و  الضاوية  وخلي  لي  ماتو  ..

العربي  زهواني  عزيزين عليه  الشيخات  و القصاير  و الشقوفة  و  مرة مرة  كايضرب  ماحيا  تاع  الحاج  طريبيشة  لي  ورث الماكينة  باش  كايقطر  من  باه  الحاج  الفاطمي  لي  كان سرقها  من دار  اليهودي  شاعوف  ملي  رحلهم  الحسن  التاني لإسرائيل  .. واخا  هكاك  كان العربي  كايبغي  ربيعة  و  كايموت على  المسمن لي  كاتقاد ليه  ملي  كايرجع  من صلاة  الفجر  ملي  كايبغي  يمشي نهار الحد يتبورد  مع القايد  و  الروبيو و  كاع  المرفحين  تاع الدوار فالفيلا  تاع  الكولونيل صابير   ..  لي  من  بعد  ايولي  صاحبنا ديما  غادي  جاي ليها حتى  غادي  تولي  ربيعة   تشك  بلي  راجلها  تبدل  عليها   مابقاش  عاطيها وقت  .. حتى فالفراش  مابقاش  كي كان  نقص  الجهد  و  المرا  ملي  تشك  فالراجل  باش  تحيد  الشك  كاتشوف  الفراش   هو لي  كايعطيها  اليقين  واش  كايخونها  ولا  لا  ..

العربي  واخا  كان كايبغي  ربيعة  إلا ان  العين  خضرة  و  تزعط  فحب  بلدي  جديد  مع  واحد  الخدامة  كاينا  في  عند  الكولونيل صابير .. شلحة  بلقة من اعالي  جبال  الاطلس  الكبير  ..كاتقطر  بالزين  ..كانت  جات  هادي  خمس  شهور  لفيلا  باش  تقابل الكوزينة و  الضياف لي  مكايساليوش  من  الزيارة  و من القصاير  لي كان الكولونيل  كايديرهم  كل  حد    ..تودة  الخدامة  كانت  زوينة  و كان لي  دخل لفيلا   كايقلب  كيفاش  يطيح  معاها  لزينها  و  لطاي  لي  عندها عامرة  و  بلقة  و  حناكها  حمر  و  لي  كايخليها  زوينة هو  الوشم لي  فالدقن  ديالها  (الكٌادومة)   هاد  الزين  كلو  خلى   عيالات الكولونيل  بزوج  ماقبلوش  فاللول  باش  تخدم  عندهم  خوفا  على  مكانتهما  ولكن  ملي  كايقرر  سي صابير  على شي  حاجة  مكاينش لي  كايناقش  معاه ..

تودة  كانت  امرأة  مات راجلها  و خلى ليها  ولد سميتو  براهيم   ملي  مات الراجل  ناضو خوتو  زربو عليها  و داو ليها الورث  و خلاوها الله  كريم  ..و هكذا  خرجات من  الدوار  ديالها  باش  تقلب  على راسها  و  جابتها الاقدار  باش  تخدم  عند  الكولونيل  صابير  تما  في  غادي  تشوف  العربي  و يتزعطو فبعضياتهم  و  تبدا  قصة  حب  لي  غادي  تقود السوايع على ربيعة   وعلى  عائلة  الكورداني  الواليد  ديال  العربي  ..

 ملي عرفات  ربيعة بالخيانة  تاع  الزوج ديالها  قررت  تخرج  ليه  من  الدار  و ترجع لدار  باها  و بما أن  خوها هو  القايد  و  باها لي  مات هو  لي  كان  القايد  قبل  ولدو  فالعائلة  تاعها  عريقة  و شابعة فلوس  و  عندهم   هكتارات تاع  الاراضي  فإقليم  بن سليمان , دخلات  لبيت النعاس  ديالها  هزات  الباليزة لي  كانت  سنين فوق  الماريو  تاع  الخشب  من نهار  جابت فيها  حوايجها  عمرها  تحركات من بلاصتها  .. بدات  تجمع  حوايجها  و  ذهوباتها  و تبكي  على زهرها  ..هنيهات قليلة دخل  العربي  ليتفاجأ بالمنظر ...

_ ياك ماترا باس  اربيعة  ...

_ نظرة  كره  " و  سير  قول  لديك  معامن  كنتي  تقوليك  مالي ..  "

بعدما  سمع  العربي  هضرتها إنقبض  قلبه و عرف  بلي  قود  السوايع  و  خلى  دار  عشتو  و  عشت  ولادو  .. اييه اسيدي  .. تفضح العشق الممنوع   و بدات  القوادة  الكحلة ... و الدار لي بنى هادي  سنين  ليوم  غاتريب  .. الحب  لي  كان بيناتهم  بدا  كايتهرس  ....

ناض  صيفط  برية   لختو  فاطنة   لي  كاينا  فالدار البيضاء  ساكنة فعين  الدياب  و  مزوجة بعميد  شرطة  مقود فكازا   علال  الشظيامي  ... الرجل  الهمام  صاحب المهمات الصعيبة  و الذي يخاف عن  اسمه اكتر ما يخاف عن  عائلته ... كات  فاطنة   اجمل بنات الدوار  و  كانت  قارية و متقفة  و  كاتسمع  لمحمود  درويش  و كاتكتب اشعار  و كانت كاتمنى  تكون كاتبة  ...

..

                                                                                                                                 يتبع....

للتواصل مع الكاتب على الفيسبوك، اضغط هنا : الكاتب الشبندق

19:28