... جبدو لفلوس لي عندهم ، غير لماصوات صحاح ، غير زرقات ، على الأقل غتكون شي عشرة ديال لمليون ، حطو تيليفونات ، داو غير واحد جوج عضوما معاهم .. خلاو كلشي عندي أو داحسو فطوموبيل ثانية أو مشاو ..... الله يا ربي الله ، أنا كيحساب ليا غنبقى غير كالسة فطوموبيل ، ساعة وليت شادة زبالة دلفلوس أو تيليفونات أو ديك ساعة حتى هي .. كون وقف عليا داك لبوليسي ديال قبيلة فهد ساعة كون سيفطني طرونسفيري للحبس .. وحلة هادي واش من وحلة .. واش هد زبل ما خاف نزيد ليهم بهاد لحزاق كامل ؟ بلحق شحال قدني نهرب منهم ، دنيا صغيرة أو صمطا كضور ، غنطيح بين يديهم غنطيح .. زايدون هادي ماشي فعايلي ، هوما تاقو فيا أو خلاو عندي هد شي .. هادو باينة فيهم غبارا ، يعلم الله إيلا كيبيعو الكوكاييين .. رجعت تاني بوحدي ، وليت تاني كنتسنى ، وليت تاني مخلوعة ..بديت كنسول راسي كثر من سؤال ، كنتخيل سيناريوات أو أفلام ، كنتخيل تجي ديك لبنت لي جيت معاها لمكناس هي أو شي حد من عائلتها دابا أش غندير ؟ واخا دارت ليا هاد لفعايل كاملة مزال دايرا ليها حساب ، كنتخيل ايجي لبوليسي لي وقف عليا ؟ وليت كنطلب يرجعو دراري كثر من أية حاجة خرى ، وليت باغا غير تكمل هاد اليلة على خير.. دراري ما تعطلو بزاف ، شي نص ساعة أو كانو عندي ، بلحق ديك نص ساعة دازت تقيلة على قلبي ، أطول نص ساعة دازت فتاريخ هد العالام .. كيفما خلاوني كالسة كيفما رجعو لقاوني باقة فنفس لكلسة ، بحال شي امانة محطوطة .. لفلوس كيفما عطيتهم ساك حطوها بيديهم ، عاودت عطيتو ليهم باش ياخدوها .. قالو لي حنى راجعين لرباط أو غتمشي معانا .. ما بغيت فلول و لكن لصقوني ، حلفو بالله ما يمشيو أو يخليوني هنا فمكناس.. تفرقنا على الطوموبيلات كل واحد فين ركب .. غادين أو كيتسابقو فطريق طيروها مني خلعة فلول ، غير دخلنا لوطوروت أو هوما يديرو عقلهم ، لوطوروت ما معاه لعب ، طريق لموت هدا ماشي لوطوروت .. ما حسيت براسي حتى لقيت بلي وصلنا لسلا ، دراري واخا دارو عقلهم فسوكان بلحق كانو كياكلو طريق ، لحديد لي عندهم مزيان .. و صلوني جيهت لبومبة ديال مهيضرة ، قلت ليهم صافي حطوني غير هنا غنكمل فطاكسي حتى لدار .. صافي نهار بان ديك ساعة أو لغادي أو لماجي ، معندي مناش نخاف .. فصراحة أنا جاية معهم فطريق أو خايفة يحبسوهم جوندارم أو يلقاو عندهم شي حاجة ، غنمشي فرجلين على لخاوي .. جبد دري لي نزل عندي لمرة لولة ربعالاف ورقة أو مدها ليا .. ما فهمت علاش مدها ليا ، طاكسي ايلا طار غيحسب عليا عشرين درهم .. كانو من لول عارفيني ما غنبغي نشد من عندهم لفلوس ، جبد واحد فيهم عشرين درهم أو مدها ليا .. أنا أصلا كان شاط ليا شي صريف لبارح ، صافي ما بقى فيا لي يتغان معاهم ، شديت لعشرين درهم ، تبادلنا نوامر ديال تيليفون أو تسالمنا .. زادو فطريقهم أو زدت حتى أنا فطريقي .. حيدات لخلعة لي كانت كاملة ، دابا ما غنتسنى حد ، لحاجة لوحيدة لي غنوقف شوية نتسناها هي طاكسي صغير يديني لدارنا .. باقة ما متيقا راسي بلي هد ليلة دوزتها غير فزنقة .. ركبت فطاكسي قصدت دارنا نيشان .. يومين ما خرجت ما درجت ، سديت عليا فدار ، ما بقات راشقة ليا على حتى حاجة ، يومين او أنا كنعاود أش طرا ليا غير مع راسي .. هاد شي لي عشتو فهديك ليلة ما كان ساهل ، أو ما عمرو غيتنسى ليا ..داكشي لي كان عندي فساك بغيت نهزو أو نحطو فساك أخر ، ما بقيت كاع حاملة داك ساك ، غير كنشوفو كنبدا نتفكر ديك ليلة لكحلة زحلة .. بديت كنقلب لمكياج أو داك تخربيق من ساك لساك ، حليت واحد جيب صغير نخويه حتى هو .. ولي ولي ولي ، لقيت فيه خمسين ألف ريال ، فلوس دراري هادو .. ناري قفارت عليا ، غيقولو غير شفرتهم ، إيلا عرفوا فلوسهم ناقصين راه يقدو يقتلوني .. هزيت تيلفون أو دخلت لبيت أو سديت عليا .. تاصلت بدري ..يتبع ..
