صليحة :الحلقة 8
سيد غد ولا يعرف يلبس او يهضر مع ناس ، ولا يخرج او يشوف دنيا ، كان بحال شي حد مسدودين ليه لعينين .. دابا صافي تحلو ليه لعينين ، جا خطبني من دارنا ، صافي باش ندير داكشي رسمي .. بغا ضاروري نديرو لعرس ، انا ما بغا لا عرس لا يديك لا يخليك ، بلحق هو باغي يفرح براسو او بيا .. عدرتو ، لي معروف لبنت هي لي كتبقا لاصقا على لعرس ، بلحق هادا حتى كبر غاد بدا يشوف دنيا شي حاجة عادية .. بغا يدير داكشي كبير .. بقا متبع هو او لوليدة الله يرحمها داكشي ، انا ما مسوقة ، مخليا لوليدة تكلف بداكشي ، اصلا لوليدة عندها لخاطر لداكشي ، لوليدة مدة او هي باغة غير امتى تفرح بيا ، كانت باغة دير ليا عرس كبير واخا تمشي تسلف ، دابا كلشي جا حتى ليديها ، هي غير كتشرط او خونا فالله كينفد ، ما كيعاود معاها لهظرة ، لي قالتها هي لي كاينة .. صافي اي حاجة كتحلم بيها شي بنت غتحقق ليا .. كلشي كان غادي مزيان ، كلشي هو هاداك .. سيد لي كان غيتجوج بيا ما كان كيكلس فسلا بزاف ، ديبو لكبير لي عندو كاين فمدينة اخرى ، كان ضاروري يسافر بزاف ، كان بعد لمرات كيكلس تما بزاف .. سيد كان كيغير عليا بزاف ، شحال من مرة نوضت صداع معاه على هد لقضية ، كان كيخاف يجي شي برهوش يطيرني ليه .. واحد لمرة سيفط لينا واحد السيد صاحبو كان عايش فلمدينة لي فيها ديبو لكبير ديال خطيبي ، سيفطو باش يكري عدنا ، حنا دار لتحتانية كانت غير خاوية ، ما مستغلينها .. صافي كريناها ليه .. انا حسيت بيه بلي سيفطو غير باش ينقل ليه الاخبار ديالي ، غير باش يوصل ليه كلشي ، بحال ايلا كارين لشي جاسوس عندنا فدار .. هانية ، ما عندي مناش نخاف ، لي ما دارش ما عندو مناش يخاف .. انا تعاملت مع سيد عادي ، او كاع درت معاه زوين ، ماشي باش ما يقول حتى شي حاجة ماشي حتى لتمى ، ولكن حينت انا هكدا كندير مع ناس كاملين زوين .. سيد غير جا كرا عندنا او كنت كنصبن ليه حوايجو ، كنهبط ليه لماكلة ، لفطور بفطورو ، لفدا بغداه او هي غادة بحال هكدا ، كل حاجة بوقتها .. فرمضان سيد لي كاري عندنا جاو عندو عائيلتو ، مو او باه ختو ، دار لتحت لي كنا كارين ليه كانت صغيرة ، يالله كافياه هو بوحدو .. تقريبا رمضان كامل او حنى هازينو هو او عائيلتو .. سيد لي كان كاري عندنا ، كان مقابل شي خدمة لخطيبي هنا ، انا متأكدة ان لخلصة لي كيعطيه خطيبي تكفيه باش يسكن فأحسن دار فسلا ، بلحق هو كاري عدنا .. كنت متأكدة بلي كيوصل كلشي لخطيبي ، شحال من مرة خطيبي كيزلق معايا فلهضرة او يجبد ليا شي حوايج متأكدة بلي ما عمرني عاودتهم ليه ، حتى كنلقى راه فخبارو بلحق عمرني ورقت ليه ديكور ، كنخليه ، ما كنبغي نبين ليه بلي عايقة بيه .. من حقو يغير عليا ، من حقو يخاف عليا ... صافي ضربنا لكاغط ، ما بقا غير خطيبي ولا راجلي ، واخا باقي ما درنا لا عرس لا والو ، دار معايا غير يرجع هد لمرة من سفر غنديرو شي عرس فاعل تارك .. غير ضربنا لكاغط او سافر او وليت نحس براسي ماشي حتى لتما ، ما بقيت كنعس ، قربت نحماق .. هي لوقت فاش شربت دوا فلموناظة ، هي فاش كنت غترما من سطح كون ما شدوني مالين دار .. انا متأكدة بلي لوليدة ديالي ماتت غير بلفقسة .. معرفتش علاش وليت هكدا ، ما بقات عاجباني حتى حاجة ، وليت كنقطع حويجي ، كنضور فمالين دار ، غير كنغوت ، كنقمش راسي .. كنت غنتسطى ...
يتبع …
