صليحة : الحلقة 13 ~العربي البحتوري~

صليحة : الحلقة 13

رجعت لدارنا فسلا ، تخبيت بين ربعة لحيوط ، من نهار جيت ما عاودت خرجت .. دازت يوماين أو دري باقي ما عيط ، دازت سيمانة ، دازت عشريام .. قلت صافي ما غادي يعيط ليا ، هناني نيت ، هكدا ما غانجاوبو ما غانقول ليه لا أيه لا لا .. صعيب نتخيل راسي كنخدم فلكوكاين ، صعيب نتصور راسي كنبيع فلغبرة .. بلحق هاد ليامات كلها لي دازت ما قدرت ننعس بقوة التفكير ، راسي تقلب عليا ، دماغي تشوش ، ما بقيت قادرة ندير والو .. من جيهة أنا محتاجة لفلوس بزاف أو من جيهة خرى ما نقدر ندير هاد لخدمة ، ماشي حينت خايفة و لكن حينت ما باغاش .. أنا عارفة راسي بلي إيلا دخلت لهذ الخدمة راه نقد بيها أو نفوتها من لهيه ، هاد الخدمة كتبغي غير بنادم يكون مجبد أو على بال أو داير بالو من البوليس أو لعطايا .. لوليد ديالي واخا غير كالس كيتسنى الموت أو حنا كالسين كنتسناو معاه بلحق كنخسروا عليه زبالة ديال لفلوس على دوايات ، لمصروف غادي أو كيتزاد .. فينما كان شي واحد كيجينا من العائلة جا هاد ليام ولا معمر الدار ، كلشي طامع فديك جوج فرانك لي كنكسابو ، كلشي طامع فلورث ، أو ما نقد نجري على شي حد أولا نقول ليه سير بحالك .. كلشي واكل شارب ناعس أو قليل لي كيعاون فلمصروف ..
من بعد ما دازت جوج ديال السيمانات تاصل بيا الدري ، مني سمعت صوتوا فتيليفون الأرض ضارت بيا ، وليت غير كندخل أو نخرج فلهضرة ، ما عرفت ما نقول ليه .. هو قال ليا بلي عارفني راه ما ساهلة عليا نجاوبو أو نقول ليه بلي صافي غانبدا نخدم معاه فهاد شي ، هو عارف بلي خاطري ما مرتاحة لهد الخدمة كيفما عارف بلي راني محتاجة لفلوس ، قال ليا أجي جربي شهر أولا شهرين بلكثير ، عجباتك الخدمة كملي فيها ما عجباتكش صافي ماشي مشكيل ، منها أنا غندير شوية ديال لفلوس أو منها هو غيكون عندو شوية لوقت باش يقلب على شي حد يخدم معاه ، راه ماشي أي واحد يقد يثيق بيه أو يجيبو يخدمو معاه ، هو شحال من عام أو هو خدام فهد الشي أو ما عمرو دخل حتى للكوميسارية غير حينت ما كيدير ثيقا بساهل
لمهم تافق معايا بلي غا يسيفط ليا شي حاجة ديال لفلوس أو من هنا لسيمانة غيتلاقاني فلمحطة ديال تران ديال مراكش .. ضحكت مني قال ليا فين غنتلاقاو ، بحال إيلا ولا مكتاب علينا نتلاقاو فشي محطة ديال تران .. قال ليا غتدوزي شي ربعيام فواحد الأوطيل غاد غنديرو اول خدمة لينا بجوج .. صافي أنا قررت نجرب أو لي ليها ليها ، غامر أو غادر ، ما طالعاش ما طالعاش ، نمشي نجرب ما غادي نخسر والو ، إيلا عجبني لحال غنكمل ما عجبني غنمشي بحالي ، شهر كيدوز بزربة ، غنجمع شي حاجة دلفلوس تنفعني لدواير زمان ، خاصني نبدا نولف نعول على راسي فكلشي ، هاد ولاد لق**ب ديال العائلة موحال يخليو ليا شي حاجة باش نعيش .. ممكن شهر غيديوز بزربة بلحق هاد السيمانة لي غا نتسنا فيها قبل ما نمشي لمراكش ممكن دوز بزربة كثر ، حينث أنا فداخل ديالي باغاها تطوال ، باغاها تولي شهر أولا عام ، خايفة أو ما عارفة مناش ..
بديت نجمع حوايجي من دابا ، شريت لماكياج بزاف ، شريت نظاظر كبار أو كاسكيطات ، بديت من دابا كنجرب ندير شي عجب فراسي باش نبدل من الشكل ديالي شي شوية .. وليت كنولف نلبس غير سبرديلات ، معولة من دابا على أنني فأي لحظة خاصني نهرب ، فأي لحظة خاصني نجري ..

.. يتبع

فيسبوك الكاتب، اضغط هنا : العربي البحتوري

20:27