صليحة : الحلقة 11 ~ العربي بحتوري ~

صليحة : الحلقة 11
العربي البحتوري

دازت عاماين أو نص ، غاد جات عيني أول مرة فعين ديك لبنت لي سمحات فيا فمكناس ، تزوجات أو ولدات ولد ، بطبيعة الحال راجلها ماشي هو هداك لي سمحات فيا على قبلو فمكناس .. ما عرفت أش ندير فهد اللحظة ، واش ندير براسي ما عرفتهاش أولا نمشي نسولها قدام راجلها أو نخصر ليها ضوسي ، أولا نسلم عليها عادي أو نزيد .. الأفكار تعمرو فعقلي ، أو ما عرفت ما ندير .. أو أنا باقي غير كنفكر ، سبقاتني هي أو قالت ليا سلام ، ديك لعيبة ديال راني شفتك بلاما تجي تسلمي عليا .. باز وجها قاسح ، معندهاش علاش تحشم ، كون كنت فبلاصتها كون راه تمنيت الأرض تتشق أو تبلعني .. أنا فمكناس كنت خايفة عليها كثر مني خايفة على راسي .. بلحق يمكن هي لي عرفات لهذ الدنيا أو أنا لا ، شوف زهرها كيف داير أو أنا زهري مكوز .. دابا أي واحد كيسمعني بلي كنت مجوجة أو طلقت كنولي نبان ليه دجاجة بكامونها ، غير كيعرف بلي ما ديت من زواج غير ورقة أو كيبدا بنادم يبعد مني ، هاد شي ولا كيمرضني .. 

من بعد هد شي كامل لي طرا ليا وليت كنخدم فلي سونطر أبيل بزاف ، بلحق ما كنطول فشي واحد ، ما كيعجبني سالير أو دوك الناس عزيز عليهم يخدموا فنوار بزاف ، ما كاين لا وراق لا سيدي زكري ، لا تأمين لا ضمان إجتماعي لا سالير مقاد .. بلحق فين ما مشيت كيشدوا فيا ، كيقولوا ليا صوتك حنين .. كنت كنخدم فلي سونطر أبيل ديال لوطيلات فمراكش بزاف ، أول مرة نعرف كاينة هاد لخدمة ، كنت كنتاصل بلكلايان ديال لوطيلات لخرين أو خصني نقنعهم يخليو لوطيل تما أو يجيوا لوطيل فاش خداما أنا .. حتى أنا ما كنت كنبغي نكلس بزاف فبلاصة وحدة ، ما بقيت كنبغي نولف ناس باش ما يطرا ليا ثاني شي حاجة ، غير كنهرب من قنت لقنت .. فواحد من هاد لوطيلات ، غتتبدل حياتي ثاني ، غنتعرف على واحد النصراني أو غنسافر أنا وياه للخاريج جوج دلمرات .. بعدا هادا جاني نيشان النهار لول قال بيا بلي راني مجوج أو عندي جوج وليدات أو كنحماق على مراتي أو باغي نعيش معاها حياتي كاملة .. هو قال ليا أنه باش يقدر يعيش معا مراتو مزيان بلا ماشاكيل خاصو مرة وحدة فلعام يخرج أو يسافر أو يعيش الحياة السعيدة ، أو هاد شي كامل بخبار مراتو أو بلموافقة ديالها أو هي لي كتشجعو من الفوق .. هاد لكور عالام بوحديتهم حتى هوما .. فنهار لول قال ليا بلي المهم عندو هو أنه يدوز يامات زوينة ، يخرج أو يضور أو يتسارا ، ماشي مهم يجمع بيناتنا لفراش ، أول مرة نخرج مع شي حد أو نحس بيه ما كيشوفني دجاجة بكامونها أو خاصو غير إمتى يبدا ياكل ... صافرت معاه لمرة لولة من بعد ما سيبت لوراق ديال الفيزا ، لمرة لولة مشينا لتركيا دوزنا فيها سيمانة .. من بعد ستة شهورة عاود تلاقيتو أو مشينا لإسبانيا أو دوزنا ربعيام ، قال ليا بلي هادي أخر مرة ممكن يشوفني فيها ، حينت ما عندو لحق يخرج مع بنت وحدة كثر من جوج دلمرات ، أنا فهمتو مزيان بلحق ما فهمت راسي ، ما فهمت شنو باغية أنا ، هو كان عارف أشنو باغي مزيان ، بلحق أنا لا ...

... يتبع

16:26