صليحة : الحلقة 10~ العربي البحتوري~

صليحة : الحلقة 10

العربي البحتوري

بزاف ديال الناس كدير فيهم لخير أو كيرجعوه ليك بو مزوي ، بلحق كاين ولاد الناس لي كيبقاو مفكرين لخير لي كديرو فيهم ، كيجي وحد النهار أو كيرضوه ليك .. الدنيا راه صغيرة ، بنادم كيفما كان غيجي وحد النهار أو غتوقف عليه ، ديك ساعة مني كتوقف على بنادم غد كتعرفوا على حقيقتو ، كتعرف اش كيسوا ، كتعرف داكشي لي درتي معاه من خير واش غتلقاه أولا غير كنتي كتكب لما فرملة ... داك السيد لي كان كاري عندنا مشا بحالو ، كان عزيز عليا ، واخا كنت عارفة بلي راه كينقل الأخبار ديالي ، بلحق كنت كنحس بيه كيدير داكشي غير بزز ، شحال من مرة عرفتو بلي خبا شي زبايل درتهم أو ما قالهم .. هو كان موظاف أو كيدير داكشي لي كيتخلص عليه ، ينقل الأخبار ديالي كانت هي خدمتو لي كيتخلص عليها ... مني مشا من عندنا كان باقي ما فخباري والو ، كنت باقا ما سقت لخبار بلي سيد لي ضرب بيا لكاغط راه مجوج ، كنت باقي نورمال ، باقي ما دخلني لحماق .. كان كمل لخدمة لي جا على وديتها ، ديك ليام كنا كنوجدو للعرس ، كنا غير غنديرو لعرس أو غنمشي نعيش مع راجلي ، غنكون تحت عينيه ديك ساعة هو لي غيحظيني ، ما غيحتاج يخدم حد .. حسيت بداك سيد لي كان كاري عندنا داير بحال شي متقاعد كيخوي لبوسط ديالو من بعد شحال من عام ديال لخدمة ، بنادم بعد لمرات كيربي لكبدة على داكشي لي كيدير ، او بعد لمرات كيكون باغي غير إمتى يتفك .. هو مخلطين فيه بجوج .. لمهم سيد لي كان كاري عندنا ، خوا لينا الدار أو رجع لمدينتو فين كان عايش ، تسالم معانا ، معايا أو مع مالين دار كاملين .. حسيت بيه فيه لبكية ، كنا دايرينو واحد منا ، ما معتابرينو كاع بلي راه براني علينا .. لمهم سيد مشى لمدينتو ، كلشي كان هو هداك ، كلشي غادي مزيان ، حنا كنوجدو للعرس ... واحد نهار كيصوني تيليفوني ، كتطلع ليا نمرة ديال سيد لي كان كاري عندنا .. معمرو تاصل بيا من نهار مشا من عندنا ، دابا راه دازت كثر من شهر غد تاصل ، حتى فاش كان ساكن عندنا كان قليل فاش كيتاصل بيا أولا بلوليدة ، غير فاش كتكون شي حاجة لي ضاروري يقولها ، كان كيبغي يبين لينا راه شاد حدودو بزاف ، ما كان كيبغي يجبد على راسو صداع .. قلت فلول هدا راه بغا يسول فينا أولا راه راجلي لي قال ليه تاصل على ود شي حاجة .. شحال أو أنا كنشوف فتيليفون كيصوني غد جاوبت ، كنشوف فنمرة بحال ايلا ما متيقاها .. من بعد ما جاوبت ، الو الو ، لاباس ، بخير ، كيف داير فلان أو فلان .. صواب كامل درناه أو فتناه من ديك جيه حتى عيقنا فصواب ، كنت حاسة بيه ما باغي غير يدير صواب ، عندو شي حاجة باغي يقولها .. واحد لوقيتة سكتنا بجوج ، صافي كنتسنا اش غيقول ، هو بحال ايلا كيزعم راسو ..
قال ليا : صليحة ، بغيت نقول ليك شي حاجة ، بلحق خايف ، خايف بزاف .. راجلك ايلا ساق ليا لخبار قلت ليك هد شي راه يقدر يقتلني .. انا غنقول ليك هد شي او لي ليها ليها .. لملحة أو طعام لي كليت فداركم ، او داكشي لي درتو معايا أو مع وليدية مني جاو لعندي ما قدرت ننساه .. لوليدة ديالي هي لي خاصمة عليا أو قالت ليا ضاروري خصك تقول كلشي لصليحة ، باش ما تبقا فدار غفلون أو تعرف معامن هي عايشة .. انا ليوم تاصلت بيك باش نقول ليك بلي راجلك راه سابق ليه مزوج ، نتي ماشي هي لمرة لولة ، لمرة لولة راه مزال عايش معاها ، او ايلا بغيتي نعطيك لادريسة ديالها فين ساكنة نعطيها ليك .. لمرة لولة راه عارفة بلي هو غادي يتزوج أو ساكتة .. أنا بغيتك نتي تسيقي لخبار أو تعرفي اش كاين .. راجلك راه شحال من وحدة خطبها أو ما كمل معاها .. نتي أول وحدة يوصل معاها حتى لزواج .. كاملين كنا كنقولو بلي نتي غير وحدة غيدوز معاها شي يامات أو من بعد ينساها .. بلحق دابا مني وصلتو للمعقول انا كان خصني نقول كلمة لحق
واش حتى لدابا غاد جاي تقول ليا هادشي ، حتى ضربنا لكاغط أو لي عطا الله عطاه ..
بديت كنغوت و نسب و نعاير ، ما خليت ما قلت ، ما حسيت ايمتا تقطع لخط ، يمكن كاع داكشي لي قلت ما سمعو .. من بعد هد لمكالمة حياتي تخربقات .. من بعد هاد المكالمة طرا ليا كاع داكشي لي عاودت ..
يتبع ...

21:53