. .معرفتش علاش وليت هكدا ، ما بقات عاجباني حتى حاجة ، وليت كنقطع حويجي ، كنضور فمالين دار ، غير كنغوت ، كنقمش راسي .. كنت غنتسطى ...
عرفت بلي راني مسحورة ، عرفت بلي دايرين ليا شي حجاب أولا شي تخربيق .. حياتي كاملة أو أنا كنقول كيفاش الناس مازال كتأمن بهاذ الخرافات ، ديما كان كيجيني داكشي غير تخربيق ، ديما كنت كنقول راه من غير شي حاجة لي تقدر تكون كليتيها او لي كتأثر عليك جسديا ما كاين شي حاجة سميتها سحور ، حينث داكشي كيكون غير توهمات كتخلق عند الناس .. بلحق دابا تبدل عليها شغل ، تزاد معايا زايد مني عرفت بلي سيد لي جا يخطبني أو ضرب بيا الكاغيط مزوج ، عندو مرة خرى قبل مني أو أنا ما سيقى لدنيا خبار ، هد المدة كاملة أو أنا مقلوبة بيا لقفة .. . فاش صقت لخبار مشيت لشي عروبيات كنقلب عليها ، لقيتها مرة مدمدمة أو محلولة .. ديك ساعة مني شفتها فهمت علاش سيد بغى يتزوج من جديد ، مراتو لولة كانت صايقة لخبار لكلشي أو ضاربة دنيا بركلة ، كانت فلول كتقول راه غير برهوشة ديال لخلا مصاحب معاها غيدوز بيها لوقت أو من بعد يرميها ، او واخا صاقت لخبار بلي خطب او باغي يتزوج ما دارت والو .. ايوا بقا ليها غير تجي تخطب ليه .. لحاجة لوحيدة لي دارت هي رفضات تسني ليه لورقة ديال لموافقة باش يتزوج او كلسات عطياها لسحورات .. بلحق هو طلع قاد بشغلو ، مشى جاب شهادة العزوبة مزورة .. لفلوس كدير كلشي .. سيد معدور مع ديك لمرة ، غيكون شاف معاها غير لويل ، سيدة واخا عطيها لفلوس ما تعرف تهضر ، ما تعرف تلبس .. والو حتى حاجة ما تعرف ديرها .. بلحق هد شي كامل ما يعطيه حق يتفلى على بنات الناس ، ما يعطيه حق يكدب او يزور .. كان عليه يقول ليا غير الصراحة ، كان عليه يقول ليا كلشي من لول ، كنت نقدر تتفهم ، كنت نقدر نوافق أو نقبل بلوضع ، كانت شحال من حاجة تقدر تتبدل .. من بعد ما عرفت بلي راه مزوج حبست كلشي مع هاد سيد ، مبقيت بغا منو والو ، غير يبعد مني .. تزوجات أو طلقات أو ماديت من زواج غير ورقة .. كاع داكشي لي كنت كتوجد ليه لواليدة على وديت لعرس ما بقا عندو حتى معنى ، كلشي تلغا .. فين غنخبي وجهي دابا فين ، شحال دناس عرضت عليهم ، لكروبات ديال لموسيقى لي دارت معاهم ، كنت غنجيب واحد المغني دشعبي مشهور ، لماكلات لي كانت كنوجد ليهم اشمن محمر أو مشوي أو بسطيلة أو زيد أو زيد .. صافي دابا كلشي مشا .. من بعد هد شي بمدة قليلة ماتت اللوليدة ، لعرس تقلب لكنازة ، من فرح لقرح .. عرفت بلي لواليدة ماتت غير بلفقسة ، ديما غنبقا نحمل راسي مسؤولية موت لواليدة ، كنشوف راسي دابا مجرمة ، قتالة .. يمكن فلول كانت كنكمي ، ولكن دابا كنكمي كثر ، زاد كمل عليا لعمليات لي دار لواليد حتى هو أو ما نجحوا .. من بعد هد شي وليت جوالة ، مخليت حتى مدينة على خاطرها : ها كازا ، ها مراكش.. كل مدينة او اش طرا ليها فيها ، كل مدينة أو قصصها بوحديتهم .. يمكن وليت كنهرب من الناس ، يمكن كنهرب من راسي ، لمهم ما بقيت كنقدر نكلس فمدينة وحدة ، تساريت لمغريب ، خرجة ثلاثة لمرات لبرا .. عايشة كل نهار بنهارو ..هادشي كامل بدا من بعد واحد مكالمة وصلاتني ...
يتبع ...
