صليحة: الحلقة الاولى ~العربي البحتوري~

سميتي صليحة ، هههه ما ديت من سميتي بزاف ، بلحق واخا هكداك ما كنديرش شي حاجة خايبة بزاف أو مرضية مع لولدين ديالي أو خصوصا لوليدة .. أصلي من مراكش ، تولدت أو كبرت تما ، دابا كثر من عشر سنين أو أنا عايشة فسلا ، أو دوزت مدة ماشي قليلة فكازا مني كنت خداما ، هادو أكثر ثلاثة مدن دوزت فيهم لووقت فحياتي حتى لهد الساعة ... كان عزيز عليا نهبط لمراكش واخا ما بقينا ساكنين فيها ، بلحق عندنا العائلة تماك أو بزاف دناس كيعرفوني ... واحد لمرة مشيت أنا أو صاحبتي لمراكش ، هادي أول مرة غاندي معايا شي حد ، واخا عندي صحابي تما بزاف وليت كنقنط ، قلت مع راسي نديها أو نتوانسو بجوج ... لمهم ديتها ، ساريتها ، ديتها لجامع لفنا ، ستي فاطمة ، أوكيمدن ... ما خليتها صرفات حتى ريال من جيبها لي حلات عليها فمها كنشريها ليها ، حتى من طرونسبور أنا لي خلصتو عليها فلألي أو فروتور .. لمهم لبنت مشات لدارهم فرحانة ، ناشطة ، ما خصها حتى خير .. رجعنا بحالنا لسلا ، أنا لدارنا أو هي لدارهم .. من موراها يالله كانت دازت شي سيمانة أولا ما كاملة ، لصقاتني قالت ليا ضاروري تهبطي معايا لمكناس لعند دارنا تما ، أنا مكناس معمرني مشيت ليها ، مشيت ليها غير مرة وحدة فوحد رحلة مع لمدرسة ، بلحق ما كلسنا بزاف كنا دايرن ديك ضورة ديال إيفران ، إيموزار ، فاس ، مكناس أو دوك النواحي .. قلت مع راسي هدي هي لفرصة نمشي نشوف مكناس كيف دايرة أو نتسارا تما شوية .. صافي هي هاديك ، قلت للواليد ديالي هاني غادية لمكناس مع صاحبتي ندوزو شي يومين تما .. لمهم أنا كنت ما خدامة دوك ليام ، لقضية ناشفة ، كانت عندي غير شي ثلثمية درهم فجيب ، هزيتها معايا .. شدينا تران ، مشينا فيه ، لا أنا لا هي كنقدرو نسوكو مسافة طويلة ، كنخافو من طريق طويلة .. لمهم أنا لي خلصت التران أو خلصت لعشا لي تعشيناه فواحد ريسطو ، هي قالت ليا غير خلصي نتي حتى نوصلو لتما أو غنرض ليك ، أنا قلت ماشي مشكيل ، أصلا ما بيناتنا لحساب .. شدينا تران معطل ، أو دار الروطار بزاف .. الله يهدي هد الترانات ديال لمغريب علينا .. فاش قربنا نوصلو لمكناس ، قالت لي صاحبتي ، راها دايرة مع واحد الساط ، فاش غتوصل غتلاقا معاه ، تشوفو شي شوية أو غاد نكملو طريق لدارهم ، ما لقيت ما نكول ليها بقيت غير ساكتة .. بقيت كنقول مع راسي ، شكون لي غا تشوف فهد لوقت لمعطل ؟ علاش ما قالت ليا هد شي من لول ؟ زايدون دابا راه مشى لحال ، شحال غتكلس معاه كاع دلوقت ؟ علاش ما تخلي هد شي حتى لغدا ؟

03:18