دازت ساعة أو ربع ، صافي قررت نصوني عليها لأول مرة ، صونيت ، ما كتجاوب ، عاودت صونيت والو ..
بديت كنتخلع عليها كتر مني أنا مخلوعة على راسي ، هداك ساط لي مشات معاه ما رتحيت ليه من أول شوفة .. صونيت أو عاودت أو والو .. ساعتين لي دازت حتى لدابا .. ميكت عليها واحد نص ساعة ما صونيت ، جبدت واحد نمرة شحال أو هي مرمية عندي فساك كعما كتعرفها صاحبتي ، ركبتها ، صونيت أو هي تجاوب ، ايوا لاباس لحمد الله لي عرفتك لاباس ، راك خلعتيني عليك .. هد شي لي قلت ليها ما سولتها كاع واش جايا دابا أو لا لا ، زربات عليا فلهضرة ، هاني جاية ، هاني حداك ، غير قطعي ، قطعي ، صافي هاني حدا لقهوة .. أو هي تقطع بلا ما تخليني نكمل هضرتي أولا نقول ليها أش عندي .. دازت ربع ساعة من بعد هد لمكالمة ما بانت .. بغيت نعاود نصوني عليها وانا نلقى تيليفونها ديالها طافي .. طفات تيليفون .. الله يا ربي الله ، أش درت لهد لبنت باش دير ليا هاد شي كامل ، واش أنا درت ليها شي حاجة أو دابا كتنتقم مني ؟ عارفا راسها ما مسالية ما تجيبني معاها تخليني غير فدارنا .. ايلا كان غير على لفلوس راه ايلا قالت ليا عطيني لفلوس نعطيها ، راه ماشي هادي هي لمرة لولة لي كنعطيها لفلوس أو معمرني قلت ليها رجعي لي ، كون غير جات على لفلوس غير ما دير ليا هاكدا .. قلت غنبقا كالسة هنا ، حتى يبان صباح أو نتاصل بمالين الدار نقول ليهم راني محتاجة فلوس أو يسفطو ليا أو ديك ساعة نشد تران أو نرجع بحالي .. فصراحة تخلعت بزاف ...
بقيت ، كالسة فديك لقهوة ، كنتسنى صباح يطلع .. ما بغى يطلع ، لوقت كيدوز ثقيل ..كنحس بشي حد جاي جيهتي .. هزيت عيني ، كيبان ليا واحد لغليض ، عندو طالكي والكي فجنب ، باينة فيه بوليسي من طيارة واخا ما عندو لكسوة ، هادا هو لبوليسي ما شي هاداك لي جا عند صاحبتي ، ما باينة عليه كاع حالة لبوليس .. باقا كنقول حتى لهد ساعة ، كنقول عليها صاحبتي .. خونا وقف عليا ، لا سلام لا كلام ، نيشان لاكارط ناسيونال ديالك .. جبدتها من الساك أو مديتها ليه .. شحال أو هو كيحنزز فيها ، قلبها من كاع جوايه ، بان ليا بحال ايلا ما عرف منين يبداها ، واش ما كيعرف يقرا أولا مالو .. بواحد صوت حرش سولني : أش كديري نتي هنا ؟ ولد لحرام ضحك عليا مني قلت ليه راه كنتسنى صحبتي غتجي تديني ، يصحابني كنتريكل عليه ، يصحابني وحدة من دوك لهاربات لي كاينين فلابواط لي كاينة فجنب هنا .. محملتش الطريقة باش ضحك عليا ، خطفت ليه لاكارط ناسيونال من يده ، صافي شافها أش غيبقى يدير بيها أو قلت ليه : شوف أنا راه كالسة فقهوة ، مكان عموموي ، هد لقهوة ما كا تبقى حالة الا وباش يكلسو فيها الناس .. كنت كنهضر أو أنا واثقة من راسي ، ما دايرة شي حاجة لي غنخاف منها ، هد لقضية ما تسرطات ليه ، كان كل مرة كيسولني واش شاربة شي حاجة أو فكل مرة كنقول ليه لي شارباه ها هو قدامك ، كافي كريم ، ايلا كانت لكافي كريم ممنوعة هنا فمكناس الله أعلم .. ما كنجي فين نفك معاه هاد لقضية ديال اش شاربة حتى كيقول ليا واش كنتي فلبواط أولا واش غادية لبواط .. صعرني ، انا غير مساوية معاه .. ضحكني فواحد لكلمة ، ضحكت عليه ، رديت ليه صرفو .. قال ليا شفتك كتهضري أو ما خيفاش .. معرفت مناش أولا علاش غنخاف ، واش من لمفروض فاش نشوفو لبوليس نخافو أولا نحسو بالأمان ؟ سؤال بديهي بلحق حسيت بلي صعيب نجاوب عليه ، يمكن هد شي لي خلاني نضحك .. زاد معاه زايد مني ضحكت ، يمكن ما حمل راسو ، حس براسو تقمع .. صعيب تكون بوليسي كتبقى مدة ونتا مقموع كتولي تقلب غير على شي حد تطلع على ضهرو كراض ، تخرج فيه داك سم كامل
يتبع ...
