حلات سارة الباب هازة فيديها كاطو و كاتغني
لينا مافهمات والو!
سارة ناشطة : السلام
لينا : أهلا ، اش كاين؟ انا عارفة باللي تاوحدة فينا ماعندها لانيف ليوم!
سارة : ليوم هو اسعد نهار فحياتي
لينا : وراكي ضريتيني فراسي ، عتقي اش كاين
سارة : اولا ، تقبلت فالخدمة الجديدة ، غادي نكون مسؤولة مؤقتا على المبيعات على مايجي المسؤول حيت عندو فوغماسيون فاسبانيا من بعد مايجي غادي ينقلوني لقسم اخور
لينا عنقاتها : مبروك عليك احبيبة ،
سارة : بلاتي مازال ماكملت
لينا : اش كاين تاني؟
سارة : اليوم كانت الجلسة الاخيرة فالمحكمة ، صافي طلقنا ، واخيرا وليت حرة واخييييرا
لينا : ايوة هكا نبغيك ، ضاحكة و ناشطة
كملو البنات السهرة ديالهوم ضحكو ونشطو ودارو فيلم يتفرجو فيه
سارة كانت فعالم اخر بقات كتفكر فكاع هادشي اللي وقع ليها ، كيفاش بهاد السرعة وقعو هاد الاحداث كاملين ؟ كيفاش كانت معمية و ماحلاتش عينيها .. كيفاش ماحساتش ان زواجها كان كذبة كبيرة .. حيت أمين عمرو غار عليها و لا غوت عليها الا كانت خارجة معاه بشي لباس فشكل ولا مزوقة .. عمرو سولها فين غادة ولا منين جاية ، كان فالاول عاجبها الحال حيت كانت كتقول مكاينش ماحسن من الحرية ، ولكن اليوم من بعد ما وقعليها هادشي عرفات باللي هاد الاحاسيس اللي ماعاشتهاش هي اللي خلاتها تحس انها ماشي انثى ، هي عمرها كانت كتقلب على الفلوس و الاملاك ، هي كانت باغة راجل يحسسها باللي هي ديالو و تحس معاه الامان و تشوف الغيرة فعينيه ،،
لينا : شفتي ياختي كيكايعاملها
سارة اللي عاد نتابهات انها نسات الفيلم وداوها افكارها بعيد : همم ! اه
لينا : هادشي مكاينش فالموغريب ياختي ما كيعرفو لا رومانسية لا جوج
سارة : وابقاي مقابلا هادو ، انا غانوض نعس غدا راه غانبدا الخدمة و مازال ماولفت نوض بكري
لينا : اوكي بيبي ، تصبحي على خير
أمين كان كالس هو وجيهان قصارين و ناشطين تاهوما
جيهان : واخيييرا وليتي ديالي ، ماباقيش غانسمح لشي وحدة تديك عليا
أمين : لامابغيتي تاوحدة تديك عليا ، هي سمعي الهضرة و زولي عليا داك بنادم
جيهان : ايوة راني قتليك اللي عندي
أمين : غدا ان شاء الله غانديرليك داكشي اللي بغيتي وموراها غاندوزو للطبيب
جيهان حسات بالارتباك : ولاش غاتمشي معايا هدا سوق العيالات اش دخلك فيه؟ وزايدون انا درت مع واحد القابلة ومابغات حد يعرفها فين كتكون
أمين : ايوة الموهيم انا اللي كنعرف هو تزولي عليا داك الموصيبة و نيت انا مامساليش عندي شغالي
جيهان عاد رجعات فيها الروح : ايوة شفتي مني كاتكون ضريف و كديرلي خاطري شحال كنبغيك انا
أمين : علاش شحال عندي منك
يتبع..
 ~ فاطمة الزهراء خولالي~){kind=link}