كَنبكي على زماني و نْتْحَسَّر
زْمان كْثَر فيه لَمْسَخْ و قَلَّة لَحْيا
والأغلبية سَاكت وْمَباغيش يْحَل فَمُّو و يهضر
كَنَبكي على الزّْمان لِي
قْلالت فيه النْيَّة و قْلاَل فيه لي كَيْتِيق
زْمان شحال من واحد فينا،
مَبْقا قادر يْمًيز بين لَعدو و بين الصديق
واش لي يْكُون معاك فْ وقت الشدة و الرخا
و لا لِي ينساك و يْنْكرك وقت الضيق
واش لي يَبغيك ف كل حالاتك،
و لا لي يبعد منك وقت تكون مريض
و عْلَى فراش الموت، كَتْوَجَّع من لَحريق
واش لي يضحك ليك ف وجهك و ينافقك
و لا لي ف قلبو على لسانو، لِي يصارحك
واش لي فاش يبغيك على حاجتو، يْجِيك يَجْري
و تْوَلِّي نتا صاحبو و خوه و عزيز عليه
و لا لِي فاش حْبَابك يْغَدروك و صحابك يْشَمْتُو فيك
يْكون الوحيد لي باغي يْعَاوْنك و يْمَد ليك إيديه.
كنَبكي على زمان
فيه ثقافة لَعْرى و الأخلاق الفاسدة
وْلاَت حاجة عادية
مُخرج عَنْد بالوا إلا عَرَّا الواقع
بْفيلم كُلُّوا جنس و لقطات إباحية
غادي يقدر يْصْلَح لبلاد و يْبدل لعقلية.
كَنَبْكِي عْلَى زْمان
فيه الإذاعة الوطنية ف عوض ما تربينا
هِي لي كَتْفْسد لينا أخلاقنا و كَتْخْرج علينا.
نبكي على زمان
و نْطَْلب الله يدينا ف الضو و يَهدينا
و يصلحنا و يْرَد بينا حتال نهار يْدِّينا.
