صليحة: الحلقة السابعة ~ العربي البوحتوري~

...لقيت فيه خمسين ألف ريال ، فلوس دراري هادو .. ناري قفارت عليا ، غيقولو غير شفرتهم ، إيلا عرفوا فلوسهم ناقصين راه يقدو يقتلوني .. هزيت تيلفون أو دخلت لبيت أو سديت عليا .. تاصلت بدري .. أنا كنهضر معاه أو هو كيضحك ، كيفرك من لمزيان ، واش هد زبل مبوق ، واش شام شي حاجة ، ولا شارب شي حاجة .. وا فلان سحا معايا أو سمعني مزيان ، راه ها اش كاين أو اش كاين .. خلعني من لمزيان مني قال ليا واخا عليك يا شفارة ، والله و نشدوك حتى ندبحوك .. بلحق ضحك لي كان غالب عليه خلاني نتنوى ، ما خلاني نتيق بهد لهضرة .. فلخر قال ليا هاداك حقك ، مناش ؟ الله أعلم ، لمهم راه حقي .. عيت ما نشرح ليه بلي ما خصني ناخد هد لفلوس ، علاش جاتني ، اش درت أنا كاع .. هوما عطاوني هد لفلوس على ديك لوقيتا لي كلست تسنيتهم فيها ، نص ساعة بلحساب بخمسين ألف ريال .. قالو ليا بلي ترجلت معاهم أو درت فيهم بليزير ما غينساوه .. انا ما بان ليا لا بليزير لا والو ، كانو يمكن يخليو داكشي فطوموبيل أو يسدو عليها أو يمشو .. عيت ما نطلب منو نيميرو دلاكارط ناسيونال باش نسيفط ليه لفلوس فماندا إكسبريس ، عيت ما نطلبو باش يجي يتلاقاني باش نعطيه لفلوس ، والو لي فراسو فراسو .. ما خليت ما درت معاه ، جهدي كامل حرقتو معاه أو والو .. فلخر صافي رضيت بلمكتاب ، شكون عطاني خمسين ألف ريال فهد لوقت ، خصوصا أنا ما خدامة هد ليام ، رزق أو جابو الله .. سؤال لي بقى ضارني فراسي هو ايلا كانو هادو تسنيتهم غير نص ساعة عطاوني خمسين ألف ريال ، لبنت لي شحال أو انا كنتسناها أو شحال من حاجة درت معاها ، شحال خصها تعطيني ؟ أحسن جواب هو تعطيني غير تيساع ، مبغيت منها والو ، لا ريال لا جدريال ، غير تبعد مني .. واخا رجعت لدار حاولت شحال من مرة نتاصل بيها أو معرفتش علاش ، يمكن حينث أنا هبيلة أو واخا دارت ليا هاد شي كامل باقية مخلوعة عليها ، يمكن حينث باغي نفهم علاش دارت معايا هكدا .. تيليفونها باقي مطفي .. لي طرا ليا مع هد البنت حاجة من لحوايج لي خلاوني نبدا نكمي ، لقيت غير لكارو نبرد فيه غدايدي ، بلحق الموت ديال الواليدة ديالي كانت هي الصدمة لكبيرة فحياتي ، أو من بعد ما دار الواليد ديالي العملية الأولى أو العملية الثانية على بروستات أو بجوج ما نجحوش ، صافي دنيا زادت كحالة فعينيا ، أو وليت كنكمي بزاف كثر من لقياس .. أنا لوليدة ديالي ماتت غير بلفقسة عليا .. ماتت من بعد ما شافتني كنت غنلوح راسي من السطح كون ما شدوني ، ماتت من بعد ما درت شي دوايات فلمونادا أو شربتهم ، كنت غنموت كون ما جات لومبيلونس هزاتني لسبيطار أو دارو ليا غسيل المعدة تما .. . دابا واخا كنكمي راه مسيقين ليا حتى حد لخبار ، كنجي للقهوة نشرب قهوتي ، نكمي مع راسي أو نمشي فحالي ، كنوصل زاز لوز لدار .. بلحق انا ما كميت حينت لوليدة ماتت ، اولا حينت لواليد دار لعمليات ، انا بديت نكمي قبل .. بديت نكمي مني كان غيديرها بيا واحد خونا ، كان غيدير ليا أكبر قالب فحياتي .. وحد سيد تعرفت عليه ، كان ناوني لزواج ، هو كبير عليا ، غيكون كبر مني بشي عشرين عام .. خدام فدكشي ديال سيراميك ، زليج .. فديك لوقيتة باش تعرفت عليه كان محرك لقضية ، بلحق مني عرفتو انا غاد قاديت ليه خدمتو ، لاقيتو مع ناس ، زاد شرا بيكوبات او لهوندات ، بنا جوج ديال ديبوات كبار ، شرا طوموبيل مفركعة ، اخر ما كاين .. مهم دار لاباس او لقضية تحركات من لمزيان .. سيد غد ولا يعرف يلبس او يهضر مع ناس ، ولا يخرج او يشوف دنيا ، كان بحال شي حد مسدودين ليه لعينين .. دابا صافي تحلو ليه لعينين ، جا خطبني من دارنا ، صافي باش ندير داكشي رسمي ..
يتبع ...

14:18