صليحة : الحلقة الأخيرة ~ العربي البحتوري ~

الحلقة الأخيرة 

خونا لي خدامة معاه قال ليا هاد لفكرة أو بقا كيشوف فيا أش غنقول ...

ما لقيت ما نقول ليه لقية راسي موافقة على الفكرة ديالو بلا ما نفكر ، بزربة قلت ليه أه ، لي بغيتيني نديرو نديرو ، شفت الوضعية لي فيها هو أو ما بغيت نكمل عليه حتى أنا بلخوف ديالي ، واخا هادشي لي غا نديرو يمكن يكون خطار أو يمكن يكون خطر من داكشي لول لي كنت كندير ، بلحق ما لقيت ما نقول ليه ، أنا من نهار لول قلت يا إما غامر يا إما غادر ما كاينش شي وحدة وسط من هادو .. حسيت براسي بحال إيلا ما بقيت كنخاف ، حسيت براسي وليت كنزعم كثر من لقياس ، خصوصا من بعد ما كان يحساب ليا غنمشي فرجلين مني شفت البوليس أو من بعد ما طرا والو .. 

صافي وافقتو على الفكرة ديالو أو بدينا كنديروها .. كنختارو لمدن لي كيدي ليهم التران ، كنمشي ليهم كنضربو ثلاثة الضربات أولا ربعة أو نرجعو بحالنا ، أو شحال من مرة كنضربو ضربتنا غير فتران ، لقليلة كنرجعو بواحد لمليون فنهار .. كل مدينة كنمشيو ليها كنقصدو لقهاوي لمزيانين فيها ، كنكلس فيهم أو كيبقى خونا لي خدامة معاه مقابلني من شي قنت بعيد .. أنا بزربة كنجبد لهضرة مع شي حد ، كنبدا ندي أو نجيب معاه فلهضرة بيدما ثاق فيا أو بيدما عرفت شحال راس مالو .. كنغفلو كندير ليه لكينة فداكشي لي كيشرب أو كي جي خونا كيدي ليه كاع لي عندو .. من الشروط باش نخدمو لواحد خاص القهوة تكون خاوية ، متكونش خاوية فمرة أو ما تكونش عاود تاني عامرة بزاف ، خاص تكون بين أو بين ، خاص ثاني نتأكد بلي فديك الساعة حتى واحد من لي كالسين ما راض البال أو من الأحسن يكونو ما كيعرفو هاداك خونا لي غا نخدمو .. 

لخدمة جاتني سهل من لولة ، لولة كان فيها تعنكيش بزاف .. هادي بلخف أو فلبلاصة كتضرب الضربة أو كتزيد بحالك ما كتعاود تشوف موراك ، أو من لفوق كتسارا لمغريب ، كل نهار مدينة ، كل مرة قنت جديد .. بقينا هاكدا خدامين ، كنضربو الصرف الصحيح ، خونا لي خدامة معاه هو لي كيتكفل باش يبيع داكشي لي صورنا ، بزربة كيفكو ، معرفا كيفاش كيدير ليه ، فلخر ديال النهار كيجي يعطيني حقي ، نهار لعيان كنطلع ثلثالاف درهم .. فين هي يامات كنت خدامة بتلثالاف درهم لشهر هههه .. 

كان كلشي غادي مزيان ، كنا كنساليو خدمتنا أو نرجعو لمراكش .. مراكش هي لمدينة الوحيدة لي ما ضربنا فيها حتى ضربة ، من غير ديك لقضية ديال الغبرة لي كنا درنا شحال هادي .. 

رجعنا هاد المرة ، كنا فمكناس فأول مدينة تلاقينا فيها نهار سمحات فيا هاديك خيتي الله يسمح ليها .. غير هبطنا فلمحطة أو قلت لخونا غير سبقني لدار أنا غا نتمشى شي شوية أو من بعد نجي ، واخا جاتو عجب ما عاود معايا لهضرة .. يالله بعد عليا بشي عشرين ميترو ، كنحس بناس شانقين عليا ، واحد من ناس لي خدمتهم ، عقل عليا أو شدني هو وصحابو .. 

بلا ما نطول عليكم بزاف .. أنا دابا فلحبس كندوز عقوبة سجنية لمدة ثلاثة سنوات ، لقاضي حكم عليا بهد المدة غير حينت الأدلة ما كانت كافية ، أو حكمو عليا من بعد ما لقاو عندي شي حوايج مسروقين فساك ..

تمت ...

فيسبوك الكاتب، اضغط هنا : العربي البحتوري

02:43