________
ليلة خمرية ، الحشيش الصحاب الشراب ، الشراب الصحاب الحشيش ،،
جوان داير دو طاف الضحك ، و فداخل ديالي كانغوت ،، الضحك غادي و كايعلى و دماغي تبنج ،، باغي نسا عاد ما زدت كانتفكر كلشي ،، تورني داير ،
تا باش نموت ماقدرش ، خايف ، جربت نتاحر ماشي مرة ماشي عشرة كانقز كانقرب نوصل للأرض كانفيق مخلووع ،
مباغيش نآدي راسي واقييلة ، و باغي نتهنا من كولشي ،،
رجعت للواقع صحابي باقين كايضحكوا جوان فإيدي طفا ،، و قفت ، هزيت قرعة ديالي خرجت بغيت نتمشا ،،
بورطابلي صونا ، بنادمة توحشاتني غبرت عليها يوماين هه ه هه ، جغمة مورا جمغة ،
كل وحدة كاتفكرني فالمرارة ديال العيشة ،، سكرت مابقا كايبان ليا والوا ،،
سحيت لقيت راسي فوق قنطرة ،، بنادم اللتحت كايتسناني نطيح ، و رايا بنادمة قالت لي هيا حاملة ،،
نقزت ،، آخر حاجة شفتها بنادمة كاتبكي وقالت لي كاتبغيني ،، غمضت عينيا كانتبسم ، وهي كاتبكي ،
فقت لقيت راسي فسبيطار ، قدامي مي من الفرحة بكات ، ماقديتش ندوي ، بغيت نوقف نهرب ماقدرتش ،
فقت لقيت راسي فالسبيطار ،، قدامي مي شافت فيا من الفرحة بكات ، مشات عيطات لبا ، جا دخل شاف فيا تنهد و خرج ،،
عادي ، آش الفرق أصلا مكنتش حاسبوا با ، بحالا قلتي هوا الجلاد و أنا المحكوم عليه ، هوا السلطان و انا المغضوب عليهم ، التداولات اللي كانت كاترا بيني و بينوا كلها كاتكون عبر مي مكانوصلوش ، الخوف ، حيت هاكا رباني ، ماربانيش نبغيه و نحتارموا ، رباني باش نتخلع منوا ،،
ست شهور و انا فالسبيطار ، تعرفات مي على بنادمة ، ولاو صحابات ماقلناش ليها بلي هيا حاملة ،، مي و بنادمة لي ديما كانشوف ، با كانشوفوا غي فالعشية إلى جا يدي مي ، كانشوف كلشي كانسمع كلشي ، و ماقادرش ندوي و لا نتحرك ،،
دازت ست شهور ، داوني للدار
وليت قادر نحرك فمي ، با ولا كايدويني كايسولني كيف بقيت ،، كايخرجني فكرسي و يدور بيا ،، و كايسولني شكون ديك الدرية اللي كاتجي عندك ديما ،،
واش معندكش صحابك دراري ، بانت لي غي هيا بوحدها لي كاتجي عندك ،،
سمعت هضرتوا تفكرت صحاب الضحكة و الجوان ،، و گاع دوك لي كانوا يقولوا ليا نتا خويا ، بلا شعور طاحت دمعة ، بغيت نمسح عينيا ماقديتش ،، با ماردتش ليا لبال حيتاش كان ورايا كايدفع الكرسي ،،
فاش رجعنا دخلنا مع دار شافتني قالت ليا مالك ، آش قال ليك باك تاني ...
.
